[考試心得星期日+時事探討星期一]
[以下內容可能會引起爭議，而且篇文真係好長]
從前，有好多人聲稱「因為中文二左入唔到U」。
結果，考評局跪低了─出得越來越淺，畀埋範文你背。
然而，好多人繼續投訴，似乎要中文科唔駛計先肯收手。
面對喱堆人，我真心覺得佢地入唔到大學絕對係應份(你話我串都要咁講)。事關，咁大個人仲睇唔通考試既本質真係好可憐。
佢地口中所講既「有用」同「冇用」，其實只係針對佢地將來工作﹑進修或者生活。同佢讀/做果科嘢有關，咪有用囉；反之，就係完全冇用，應該拎去皇天擊殺。如果照喱個邏輯去推，發生既情況就會係咁：
「我大學讀中文，英文關我鬼事咩？」
「My major is English, 果D咩莊子孔子, I don't care about whaT they said 囉！」
「我讀Marketing既，學theory of numbers來把鬼呀？」
事實上，如果真係拎佢地果套謬論去決定一科存廢與否，基本上冇咩科可以留低。
老老實實，每科總會有內容係貼地，有內容係離地，哪怕幾實用都好，總會有內容對於你來講係冇用。如果因為咁而廢科，其實真係可以唔駛讀書。再講，即使果門學問對你有用，其實都唔等於對我、對其他人有用。你可以話了解科學，能夠接觸宇宙嘅真理；我可以話傳宗接代，唔駛知道勃起嘅原理。總而言之，「對我冇用=科嘢要cut」嘅邏輯，錯到阿媽都唔認得。
另外，你估考試真係考你係咪「知書識墨」，有冇「真知灼見」咩！至少，中學年代嘅考試一定唔係。佢考嘅，係考你識唔識「玩遊戲」─同一條規則，同一個課程下，利用你本身擁有嘅資源同能力，去拎到最高嘅分數。遊戲嘅目的，就係為咗汰弱留強。
雖然，對於「唔識考試就等於弱，識考試就等於強」一點，我個人絕對有保留。但奈何上位者訂左個咁嘅遊戲出來，我地呢堆small potato唯有照玩。無論係會考、高考定係DSE，其實考緊嘅都係「物競天擇，適者生存」。你係全才，你叻你威；你有弱點，唔該你同我想辦法拉上補下。總之：
「我唔理你叻文史定係叻數理，有冇父幹同埋補唔補習，總之你同我死夠廿分返嚟，完！」
設計個遊戲嘅人，正正就係咁諗。成件事對你來講，可能係不可理喻，可能係有失公平，但呢個就係現實。而一個有能力嘅人，即使幾不可理喻幾唔公平都好，佢都會生存到。
所以，與其日日係度對住自己份數學卷自我安慰，日日投訴自己懷才不遇，日日諗點樣去抹黑中文，不如好好諗下你科中英文點樣保住個3，果廿分點樣拉上補下。
現實一向殘酷，你點投訴都於事無補。夠鐘長大啦，中學雞。
資料來源：香港01
#BenSir #BenSir同你學教仔 #與其complain不如好好溫書
Search